ឯកអគ្គរដ្ឋទូតគុយបា៖ ឆ្នាំនេះ គឺជាឆ្នាំខួបលើកទី៦០ នៃទំនាក់ទំនងការទូតនៃប្រទេសកម្ពុជា និងគុយបា
06-February-2020 | ដោយ ពលមនសិការ
ភ្នំពេញ៖ នាព្រឹកថ្ងៃទី០៦ ខែកុម្ភៈ ឆ្នាំ២០២០ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានទទួលជួបសវនាការជាមួយនឹងលោកជំទាវ លីយ៉ូរកា រ៉ូឌ្រីហ្គេស បារីយ៉ូ (Liurka Rodriguez Barrios) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋគុយបា នៅវិមានព្រឹទ្ធសភា។
ក្នុងនាមព្រឹទ្ធសភា និងក្នុងនាមសម្តចផ្ទាល់ សម្តេចវិបុលសេនាភក្តី សាយ ឈុំ បានសម្តែងការអបអរសាទរ និងស្វាគមន៍ចំពោះលោកជំទាវ លីយ៉ូរកា រ៉ូឌ្រីហ្គេស បារីយ៉ូ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋគុយបា ប្រចាំព្រះរាជាណាចក្រកម្ពុជា។ តាមរយៈបេសកកម្មការទូតរបស់លោកជំទាវ នៅព្រះរាជាណាចក្រកម្ពុជា នឹងរួមចំណែកដល់ការពង្រឹងពង្រីកនូវចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេស និងប្រជាជនទាំងពីរដែលមានតាំងពីយូលង់ណាស់មកហើយឱ្យកាន់តែរឹងមាំថែមទៀត។
មានប្រសាសន៍ក្នុងឱកាសនោះ លោកជំទាវ លីយ៉ូរកា រ៉ូឌ្រីហ្គេស បារីយ៉ូ បានថ្លែងអំណរគុណយ៉ាងជ្រាលជ្រៅចំពោះសម្តេចប្រធានព្រឹទ្ធសភា ដែលបានចំណាយពេលវេលាដ៏មានតម្លៃ អនុញ្ញាតឱ្យលោកជំទាវចូលជួបសម្តែងការគួរសមនាពេលនេះ។ លោកជំទាវឯកអគ្គរដ្ឋទូត បានជម្រាបជូនសម្តេចប្រធានព្រឹទ្ធសភាជម្រាបថា ឆ្នាំនេះ គឺជាឆ្នាំខួបលើកទី៦០នៃទំនាក់ទំនងការទូតនៃប្រទេសទាំងពីរ។ លោកជំទាវបានសន្យាថា នឹងរៀបចំសកម្មភាពសំខាន់ៗ ឱ្យបានច្រើន ដើម្បីអបអរសាទរខួបលើកទី៦០នេះ។
ជាពិសេសលោកជំទាវឯកអគ្គរដ្ឋទូត បានជម្រាបជូនសម្តេចប្រធានព្រឹទ្ធសភាអំពី ជំនួបរវាងលោកជំទាវជាមួយនឹងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយបានលើកឡើងអំពី កម្មវិធី និងសកម្មភាពសំខាន់ៗមួយចំនួន ដើម្បីប្រារព្ធខួបលើកទី៦០ឆ្នាំ នៃទំនាក់ទំនងការទូតរវាងប្រទេសទាំងពីរ។
លោកជំទាវឯកអគ្គរដ្ឋទូត បានថ្លែងអំណរគុណចំពោះរាជរដ្ឋាភិបាល និងប្រជាជកម្ពុជា ដែលតែងតែគាំទ្រប្រទេសគុយបាជានិច្ចក្នុងក្របខណ្ឌកិច្ចសហប្រតិបត្តិការអន្តរជាតិ។ លោកជំទាវបានអះអាងថា ក្នុងអាណត្តិបេសក- កម្មការទូតរបស់លោកជំទាវនៅព្រះរាជាណាចក្រកម្ពុជា លោកជំទាវនឹងខិតខំប្រឹងប្រែងជំរុញកិច្ចសហប្រតិបត្តិការលើគ្រប់វិស័យរវាងប្រទេសទាំងពីរឱ្យមានសភាពកាន់តែសកម្មបន្ថែមទៀត។
សម្តេចប្រធានព្រឹទ្ធសភា បានថ្លែងអំណរគុណចំពោះប្រសាសន៍ដ៏ល្អប្រពៃរបស់លោកជំទាវឯកអគ្គរដ្ឋទូត។ ប្រទេសទាំងពីរ កម្ពុជា និងគុយបា បានបង្កើតទំនាក់ទំនងការទូតតាំងពីឆ្នាំ១៩៦០ ដោយស្នាប្រហស្តព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងថ្នាក់ដឹកនាំគុយបាជំនាន់មុន។ ទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ត្រូវបានពង្រឹង និងពង្រីកជាបន្តបន្ទាប់ ស្តែងឡើងតាមរយៈនៃការផ្លាស់ប្តូរដំណើរទស្សនកិច្ចរវាងថ្នាក់ដឹកនាំកំពូល ថ្នាក់ដឹកនាំជាន់ខ្ពស់ និងថ្នាក់ដឹកនាំជំនាញរបស់ប្រទេសទាំងពីរ ក៏ដូជាការជួយឧបត្ថម្ភគាំទ្រគ្នាក្នុងក្របខណ្ឌកិច្ចសហប្រតិបត្តិការអន្តរជាតិ។
សម្តេចប្រធានព្រឹទ្ធសភា បានសម្តែងនូវសេចក្តីរីករាយដោយមើលឃើញអំពី ទំនាក់ទំនង មិត្តភាព សាមគ្គីភាព និងកិច្ចសហប្រតិបត្តិការរវាងប្រជាជន និងប្រទសទាំងពីរ មានការរីកចម្រើនជាលំដាប់។ ជាមួយគ្នានោះ សម្តេចប្រធានព្រឹទ្ធសភា បានថ្លែងអំណរគុណចំពោះរដ្ឋាភិបាលគុយបា ដែលតែងតែបានជួយឧបត្ថម្ភគាំទ្រ និងផ្តល់យុត្តិធម៌ដល់ប្រជាជនកម្ពុជាក្នុងគ្រប់កាលទេសទាំងអស់ តាំងពីសម័យតស៊ូរំដោះជាតិរហូតមកដល់ពេលបច្ចុប្បន្ននេះ។ សម្តេចប្រធានព្រឹទ្ធសភា ក៏បានថ្លែងអំរណគុណចំពោះប្រទេសគុយបាផងដែរអំពី ការផ្តល់ជំនួយខាងវិស័យសុខាភិ-បាល កសិកម្ម អប់រំ ក៏ដូចជាផ្តល់អាហារូបករណ៍ដល់និស្សិតកម្ពុជា ទៅសិក្សានៅប្រទេសគុយបា និងការគាំទ្រប្រទេសកម្ពុជាជាសមាជិកនៃក្រុមប្រឹក្សាសេដ្ឋកិច្ច សង្គម និងវប្បធម៌នៃអង្គការសហប្រជាជាតិ (ECOSOC) ហើយប្រទេសកម្ពុជា ក៏បានគាំទ្រប្រទេសគុយបាជាសមាជិកក្រុមប្រឹក្សាសិទ្ធិមនុស្សផងដែរ។
សម្តេចប្រធានព្រឹទ្ធសភាបានបញ្ជាក់ថា ដូចអ្វីដែលលោកជំទាវឯកអគ្គរដ្ឋទូតបានលើកហើយថា ឆ្នាំនេះ គឺជាខួបលើកទី៦០នៃទំនាក់ទំនងការទូតរវាងប្រទេសទាំងពីរ ក្នុងនោះរដ្ឋាភិបាលនៃប្រទេសទាំងពីរ បានឯកភាពគ្នាធ្វើសកម្មភាពមួយចំនួន ដើម្បីអបអរសាទរខួបជាប្រវត្តិសាស្ត្រនេះ។ ក្នុងនាមព្រឹទ្ធសភាកម្ពុជា និងក្នុងនាមសម្តេចផ្ទាល់ សម្តេចប្រធានព្រឹទ្ធសភា បានសម្តែងនូវសេចក្តីរីករាយ និងគាំទ្រទាំងស្រុងនូវគ្រប់សកម្មភាពដែលរដ្ឋាភិបាលនៃប្រទេសទាំងពីរបានឯកភាពគ្នានេះ។
ក្នុងនាមព្រឹទ្ធសភា និងក្នុងនាមសម្តេចផ្ទាល់ សម្តេចប្រធានព្រឹទ្ធសភា បានប្រកាសត្រៀមខ្លួន នឹងធ្វើកិច្ចសហប្រតិបត្តិការល្អជាមួយនឹងលោកជំទាវឯកអគ្គរដ្ឋទូត ដើម្បីរួមចំណែកដល់ការពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រជាជន និងប្រទេសទាំងពីរ ទាំងក្នុងពេលបច្ចុប្បន្ន និងទៅអនាគត។
សម្តេមប្រធានព្រឹទ្ធសភា បានជូនពរលោកជំទាវឯកអគ្គរដ្ឋទូត ឱ្យមានសុខភាពល្អ និងទទួលបានជោគជ័យក្នុងការបំពេញបេសកកម្មការទូតនៅព្រះរាជាណាចក្រកម្ពុជា៕
ចំនួនអ្នកទស្សនា
- ថ្ងៃនេះ3791
- ម្សិលមិញ15681
- សប្តាហ៍នេះ62631
- ខែនេះ84511
- ឆ្នាំនេះ84511
- សរុប20526967